पुणे : शिक्रापूर ता. शिरुर येथे गोडाऊन बाहेर उभा केलेला ऍल्युमिनियमचा माल भरलेला ट्रक व ट्रक मधील मुद्देमाल असा सुमारे अठ्ठेचाळीस लाख पन्नास हजार रुपयांचा ऐवज चोरून नेणाऱ्यांना शिक्रापूर पोलिसांच्या पथकाने चोवीस तासात जेरबंद केले. सुधील गंगाधर भारती वय -४६, रोहित सुधीर भारती वय -२२ वर्षे रा.दोघेही शिक्रापूर ता.शिरूर जि.पुणे मूळ रा.टाकळसिंग ता.आष्टी जि.बीड व गजानन रामभाऊ जाधव रा.कोरेगाव भीमा ता.शिरूर जि.पुणे मूळ रा.विरेगाव ता.जालना जि.जालना अशी शिक्रापूर पोलिसांनी जेरबंद केलेल्या तिघा आरोपींची नावे आहेत.
शिक्रापूर पोलीसांनी दिलेल्या माहितीनूसार, शिक्रापूर (ता. शिरूर) येथील एका गोडाऊनमध्ये पिंपरी चिंचवड मधील सिद्धिविनायक रोडलाईन्स या ऑफिस मधून एम एच ०६ के ३९८२ या ट्रक मध्ये त्रेचाळीस लाख पन्नास हजार रुपयांचा ऍल्युमिनियमचा माल घेऊन ट्रक चालक आलेला होता, सदर ट्रक चालकाने ट्रक गोडाऊन बाहेर उभा करुन जेवण करण्यासाठी गेला काही वेळाने जेवण करुन आला असता ट्रक जागेवर नसल्याचे दिसून आले, त्यांनतर त्याने सिद्धिविनायक रोडलाईन्सचे व्यवस्थापक मनोहर मारणे यांना फोन करुन माहिती दिली, सर्वांनी परिसरात ट्रकचा शोध घेतला मात्र ट्रक मिळून आला नाही, त्यामुळे त्रेचाळीस लाख पन्नास हजार रुपयांचा ऍल्युमिनियमचा माल व पाच लाख रुपये किमतीचा ट्रक असा सुमारे अठ्ठेचाळीस लाख पन्नास हजार रुपयांचा ऐवज चोरीला गेल्याचे निदर्शनास आल्याने मनोहर काशिनाथ मारणे वय ५८ वर्षे रा. कासारवाडी ता. हवेली जि. पुणे यांनी शिक्रापूर पोलीस स्टेशन येथे फिर्याद दिली .
शिक्रापूर पोलिसांनी अज्ञात इसमावर गुन्हे दाखल केले तर सदर गुन्ह्याचा तपास करत असताना चोरीला गेलेला ट्रक शिक्रापूर चाकण रस्त्यालगत असलेल्या एका हॉटेलच्या पाठीमागे लावला असल्याची माहिती शिक्रापूर पोलिसांना मिळाली त्यानंतर पोलीस हवालदार श्रीमंत होनमाने, पोलीस नाईक अमोल दांडगे, विकास पाटील,जयराज देवकर,शिवाजी चितारे,लखन शिरसकर रोहिदास पारखे यांनी सदर ठिकाणी जाऊन पाहणी केली असता ट्रक व ट्रक मध्ये तिघेजण मिळून आले यावेळी पोलिसांनी तातडीने तिघांना ताब्यात घेत मुद्देमालाच्या ट्रक जप्त करत सुधील गंगाधर भारती वय ४६ वर्षे, रोहित सुधीर भारती वय २२ वर्षे दोघे रा. शिक्रापूर ता. शिरुर जि. पुणे मूळ रा. टाकळसिंग ता. आष्टी जि. बीड व गजानन रामभाऊ जाधव रा. कोरेगाव भीमा ता. शिरुर जि. पुणे मूळ रा. विरेगाव ता. जालना जि. जालना या तिघांना अटक केली असून सदर गुन्ह्याचा पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस नाईक अमोल दांडगे हे करत आहेत.
