♦️महाविकास आघाडीच्या जागा वाटपाबाबत दोन-तीन बैठका झाल्या आहे. १२५ जागांवर सहमती झाली आहे. उर्वरित जागांवर गणेश विसर्जनानंतर बैठक होऊन सहमती होईल. समविचारी पक्षांना बरोबर घेऊन आम्ही निवडणूक लढवणार असून महाविकास आघाडीला अत्यंत चांगले वातावरण आहे. आगामी विधानसभा निवडणुकीत १८० पेक्षा जास्त जागा आम्ही मोठ्या मताधिक्याने जिंकू, असा विश्वास काँग्रेस विधीमंडळाचे पक्षनेते, आमदार बाळासाहेब थाेरात यांनी व्यक्त केला.
♦️संगमनेर येथे माध्यमांशी बोलताना ते म्हणाले, ”महायुतीमध्ये सध्या फक्त मारामारी सुरू आहे. त्यांची दररोज भांडणे आपण पाहत आहोत. त्यामुळे त्यांची आणि महाविकास आघाडीची तुलना नको, असेही आमदार थोरात यांनी म्हटले आहे. इतर समविचारी पक्षांना बरोबर घेण्यासाठी वरिष्ठ पातळीवर निर्णय होईल. तसेच महाराष्ट्रात झालेली पक्ष फूट किंवा कुटुंबातील फूट ही राज्यातील जनतेला आवडली नाही. लोकसभा निवडणुकीमध्ये त्याचा प्रत्यय महायुतीला आला आहे. बंधुभाव ही आपल्या देशाची ताकद असून ती वाढवण्यासाठी महाविकास आघाडी काम करत आहे. त्यामुळे येणार्‍या विधानसभेत मोठ्या मताधिक्याने १८० जागा जिंकू,” असा ठाम विश्वास त्यांनी व्यक्त केला.
