प्रतिनिधी आयुब शेख
तुळजापूरच्या ड्रग्ज प्रकरणासंदर्भात राष्ट्रवादी (शरद पवार) पक्षाच्या खासदार सुप्रिया सुळे यांनी केलेल्या वक्तव्यांवरून राजकीय तापमान चांगलेच वाढले आहे. या पार्श्वभूमीवर माजी मंत्री आणि आमदार राणा जगजीतसिंह पाटील यांनी सुप्रिया सुळे यांना संबोधित करत थेट खुले पत्र प्रसिद्ध केले आहे.
राणा पाटील यांनी पत्रात स्पष्ट केले आहे की,
“ज्याप्रमाणे आदरणीय अजितदादा आणि सुनेत्राआत्या माझे नातेवाईक आहेत, त्याच प्रेमाने आपणही माझ्या थोरल्या बहिणीसारख्या आहात. परंतु चुकीच्या किंवा अपुऱ्या माहितीतून माझ्याविषयी सलग वक्तव्ये होत असल्याने मनात खंत आहे.”
ड्रग्ज प्रकरणावर वस्तुनिष्ठ माहिती द्यायला हवी होती — राणा पाटील
तुळजापूरच्या ड्रग्ज प्रकरणात आपण केलेली वक्तव्ये शहराची बदनामी करणारी असून ती राजकीय हेतूपुरस्सर ‘मीडिया ट्रायल’ला चालना देणारी आहेत, असा ठपका राणा पाटील यांनी ठेवलाय.
ते पुढे म्हणतात—
माजी नगराध्यक्ष संतोष परमेश्वर हे भाजपात प्रवेश होईपर्यंत राष्ट्रवादी (एसपी) चेच प्रमुख नेते होते.
ड्रग्ज प्रकरणी आरोप लागल्यानंतरही त्यांना पक्षातून काढले नव्हते.
“दोष सिद्ध होईपर्यंत व्यक्ती निरपराध” — या डॉ. बाबासाहेब आंबेडकरांनी दिलेल्या तत्त्वाचीच आपण अनेक वेळा बाजू घेतली आहे.
“मी स्वतः पोलिसांना माहिती दिली; तरी सहकार्य करणाऱ्यांनाच आरोपी बनवले”
विधानसभा निवडणुकीदरम्यान स्थानिक महिलांकडून ड्रग्जबाबत माहिती मिळाल्यावर मी स्वतः जिल्हा पोलिस अधीक्षकांना iMessage करून सर्व माहिती दिली, स्थानिक गुन्हे शाखेलाही जोडले, असे राणा पाटील यांनी सांगितले.
या प्रकरणात खरे सहकार्य करणाऱ्यांनाच आरोपी बनवण्यात आले, अशी गंभीर टीकाही त्यांनी केली.
न्यायालयाने जामीन देताना हे मुद्दे नोंदवले आहेत, असेही पत्रात नमूद आहे.
शताब्दी रुग्णालय निविदा प्रकरणावरही खुलासा
अंजली दमानिया यांनी केलेल्या आरोपांना उत्तर देताना राणा पाटील यांनी म्हटले—
“शताब्दी रुग्णालयाच्या निविदेत तेरणा ट्रस्टने फक्त सहभाग घेतला. दोन-तीन वेळा निविदा मागवूनही कोणी पुढे आले नव्हते. तिसऱ्यांदा तेरणा ट्रस्ट सहभागी झाला — यात नेमके चुकीचे काय?”
“आपल्या सर्व शंका दूर करण्यास तयार” — राणा पाटील
पत्राच्या शेवटी त्यांनी सुप्रिया सुळे यांना चर्चा करण्याचे खुले आमंत्रण दिले आहे—
“आपल्याला अजूनही काही शंका असल्यास मी संपूर्ण पुराव्यांसह चर्चा करण्यास सदैव तयार आहे.”