* गाडी जाळण्याच्या संशयावरून तरुणाला रोडने बेदम मारहाण
* मारहाणीत गंभीर जखमी झालेल्या तरुणाचा उपचारादरम्यान दुर्दैवी मृत्यू
* मयत सागर भगवान आगलावे (वय अंदाजे २३ वर्षे)
* आरोपींना अटक होत नाही तोपर्यंत मृतदेह ताब्यात घेण्यास नातेवाईकांचा नकार.
जालन्यात गाडी जाळण्याच्या संशयावरून एका तरुणाला रोडने बेदम मारहाण केल्याची धक्कादायक घटना समोर आली आहे. या हल्ल्यात गंभीर जखमी झालेल्या तरुणाचा आज उपचारादरम्यान दुर्दैवी मृत्यू झाला आहे. सागर भगवान आगलावे (वय अंदाजे २३ वर्षे) असे मृत तरुणाचे नाव आहे.
मागील शनिवारी जालना शहरातील भवानीनगर भागात राहणाऱ्या सागर आगलावे यांना गाडी जाळण्याच्या संशयातून २ ते ३ जणांनी रोडने बेदम मारहाण केली होती. या घटनेत गंभीर जखमी झाल्याने त्यांना गंभीर अवस्थेत जालना येथील जिल्हा सामान्य रुग्णालयात उपचारासाठी दाखल करण्यात आले होते. मात्र, उपचारादरम्यान आज त्यांचा मृत्यू झाला. या प्रकरणी कदीम जालना पोलीस ठाण्यात गुन्हा दाखल करण्यात आला असून, जोपर्यंत आरोपींना अटक होत नाही तोपर्यंत मृतदेह ताब्यात न घेण्याचा पवित्रा मयताच्या नातेवाईकांनी घेतला आहे.
एनटीव्ही न्यूज मराठी, जालना