- जाफराबाद तालुक्यात २३ हजार नोंदणीकृत बांधकाम कामगार असूनही सुविधांचा अभाव.
- रिनेवल, नवीन नोंदणी, आणि पडताळणी यांसारख्या सुविधा केंद्रात मिळत नाहीत.
- ‘सेफ्टी किट’ आणि ‘लेबर कार्ड’साठी भोकरदन, राजूर किंवा जालना येथे चकरा माराव्या लागतात.
- जाफराबाद येथील कार्यालयात पंधरा दिवसांत सुविधा उपलब्ध करा, अन्यथा तीव्र आंदोलनाचा इशारा.
सुविधांसाठी आर्थिक भुर्दंड थांबवा! धडक कामगार युनियनचे जिल्हाधिकाऱ्यांकडे निवेदन
जाफराबाद धडक कामगार युनियन जाफराबाद तालुका महासंघच्या वतीने माननीय जिल्हाधिकारी, जिल्हा जालना यांना निवेदन देण्यात आले आहे. निवेदनामध्ये जाफराबाद तालुक्यात नोंदणीकृत बांधकाम कामगार संख्या २३ हजार असून सुद्धा साहित्य पुरेशा प्रमाणात मिळत नाही, अशी तक्रार करण्यात आली आहे. जाफराबाद येथे इमारत बांधकाम सुविधा केंद्र उपलब्ध आहे, परंतु रिनेवल, नवीन नोंदणी, आणि पडताळणी इत्यादी सुविधा केंद्रात मिळत नाहीत, तेव्हा लवकरात लवकर सर्व बांधकाम कामगारांना शासनमान्य सुविधा उपलब्ध करून देण्यात याव्यात, असे निवेदनात म्हटले आहे. तसेच सेफ्टी किट, आवश्यक कीट, घरगुती वस्तूंचे किट, लेबर कार्ड इत्यादी योजनांसाठी लागणारे थंब यासाठी भोकरदन, राजूर किंवा जालना इत्यादी ठिकाणी चकरा माराव्या लागतात, त्यामुळे गोरगरीब कष्टकरी बांधकाम कामगारांना अतिरिक्त आर्थिक भुर्दंड व वेळ खर्च करावा लागतो. त्यामुळे तालुक्यातील बांधकाम कामगारांसाठी जाफराबाद येथील कार्यालयात येत्या पंधरा दिवसांच्या आत या सुविधा उपलब्ध करून देण्यात याव्यात, अन्यथा येत्या काळात धडक कामगार युनियन महासंघाच्या वतीने तीव्र आंदोलन छेडण्यात येईल व अशावेळी कायदा व सुव्यवस्थेचा प्रश्न निर्माण झाल्यास याची सर्वस्वी जबाबदारी आपली राहील, अशा आशयाचे निवेदन माननीय जिल्हाधिकारी, जालना यांना देण्यात आले आहे. या निवेदनावर अध्यक्ष सुनील हिवाळे, नासिरखान, शरद गायकवाड, उपाध्यक्ष निसार शहा, रईस पठाण, नूरखान, विजय लोखंडे, शाहीद खान, शेख फाईमभाई, सुरेश काटोटे, कैसर भैय्या, अनिस भाई नाजीर भाई, नितीन दाभाडे इत्यादी कामगार संघटना पदाधिकाऱ्यांच्या सह्या आहेत.प्रतिनिधी राहुल गवई
एनटीव्ही न्यूज मराठी, जाफराबाद जालना