हिपरगा जानेराव येथील सभागृहाचा लोकार्पण सोहळा आ. राजेश पवार व पुनमताई पवार यांच्या हस्ते संपन्न..!

• पुनमताई पवार यांच्या जिल्हा परिषद तिकीट मागणीला पक्ष सकारात्मक – आ. राजेश पवार

नायगाव, नांदेड (दिनांक १७ नोव्हेंबर)

नांदेड: नांदेड जिल्ह्यातील नायगाव तालुक्यातील हिप्परगा जानेराव येथील सिध्देश्वर मंदिर परिसरातील सभागृहाचा लोकार्पण सोहळा आज, दिनांक १७ नोव्हेंबर २०२५ रोजी, नायगाव विधानसभेचे आमदार राजेश पवार आणि भाजपच्या जिल्हा सरचिटणीस सौ. पुनमताई पवार यांच्या शुभहस्ते मोठ्या उत्साहात पार पडला.

सभागृहाचे लोकार्पण आणि संत ज्ञानेश्वर समाधी सोहळा

संत ज्ञानेश्वर महाराज समाधी सोहळ्याच्या शुभ मुहूर्तावर या लोकार्पण सोहळ्याचे आयोजन करण्यात आले होते.

• कार्यक्रमाची सुरुवात सिद्धेश्वर मंदिर, विठ्ठल-रुक्मिणी आणि संत ज्ञानेश्वर महाराजांच्या पूजा-आरती करून झाली.
• यावेळी हिप्परगांव जानेरावसह सोमठाणा, गंगनबीड, रान सुगाव, कुष्णूर परिसरातील भाविक भक्त व महिला मोठ्या संख्येने उपस्थित होत्या.
• कार्यक्रमादरम्यान, लोकचर्चेत असलेल्या पुनमताई पवार यांच्या वतीने महिलांना साडी वाटपाचा कार्यक्रमही घेण्यात आला.

पूनमताई पवार यांच्या उमेदवारीबाबत सकारात्मकता

सध्या बरबडा सर्कलमध्ये भावी जिल्हा परिषद सदस्य म्हणून पूनमताई पवार यांच्या नावाची जोरदार चर्चा सुरू आहे. या चर्चेवर आमदार राजेश पवार यांना विचारले असता ते म्हणाले की, “बरबडा सर्कलसाठी अनेक कार्यकर्त्यांनी तिकीट मागणी केली असून, पुनमताई पवार यांच्या जि.प. सदस्य तिकिटाच्या लोक मागणीला पक्ष सकारात्मक आहे.”

यावेळी व्यासपीठावर आमदार राजेश पवार, भाजप जिल्हा सरचिटणीस पुनमताई पवार, मा. तालुकाध्यक्ष दत्ता पा. ढगे, नायगाव तालुका भाजपा अध्यक्ष बालाजी मंदेवाड, दक्षिण तालुकाध्यक्ष श्रीहरी देशमुख नरंगलकर, मारोतराव ढगे तसेच परमेश्वर पा. जाधव, प्रकाश हेंडगे, सोपान कदम, पत्रकार लक्ष्मण बर्गे, पत्रकार हनुमंत चंदनकर, भगवान शेवाळे व गावातील प्रतिष्ठित नागरिक मोठ्या संख्येने उपस्थित होते. कार्यक्रमाची सांगता महाप्रसादाने झाली.

सोमठाणा साठवण तलावाचे जलपूजन

या लोकार्पण सोहळ्याच्या निमित्ताने सोमठाणा गावासाठी एक अत्यंत महत्त्वाचा ऐतिहासिक क्षण साक्षीला आला. सोमठाणा गावासह परिसरातील अनेक गावांची तहान भागविणारा आणि जवळपास ४५० ते ५०० एकर शेतीला पाण्याची सोय करून देणारा साठवण तलाव पूर्णत्वास जाऊन त्याचे जलपूजन करण्यात आले.

२००९ सालापासून या प्रकल्पासाठी सतत पाठपुरावा सुरू होता. विविध लोकप्रतिनिधी व ग्रामस्थांच्या प्रयत्नानंतरही अडचणी येत होत्या. ग्रामस्थांच्या विनंतीनंतर आमदार राजेश पवार यांनी पुढाकार घेत हा विषय मार्गी लावला आणि भाजप-महायुती सरकारच्या माध्यमातून सुधारित प्रशासकीय मान्यता मिळवून देत या प्रकल्पाचे काम सुरू केले.

प्रकल्पपूर्तीचा आनंद व्यक्त करताना आमदार राजेश पवार म्हणाले, “प्रकल्पपूर्तीपेक्षा हे लोककल्याणकारी कार्य केल्याचा आनंद आणि समाधान मिळत आहे.” पुढील काळातही मतदारसंघातील सिंचन वाढीसाठी प्रयत्न सुरू राहतील, असे आश्वासन त्यांनी दिले.

कार्यक्रमास मातोश्री श्रीमती लोक्याबाई संभाजी पवार, हिपरगा जानेराव येथील अनेक प्रतिष्ठित नागरिक, महिला, युवा, शेतकरी तसेच भाजप-महायुतीतील पदाधिकारी-कार्यकर्ते मोठ्या संख्येने उपस्थित होते.

प्रतिनिधी हनुमंत चंदनकर,

एनटीव्ही न्यूज मराठी, नायगाव, नांदेड.